თბილისის მუნიციპალიტეტის საკრებულოს ქონების მართვისა და საფინანსო-საბიუჯეტო კომისიის თავმჯდომარე ჯაბა სამუშია სახელმწიფო აუდიტის სამსახურს მიმართავს და აცხადებს, რომ მიწის ფასთან დაკავშირებული შეკითხვების ადრესატი ლევან სამხარაულის სახელობის სასამრთლო ექსპერტიზის ეროვნული ბიუროა.
“არც მერია და არც საკრებულო მიწის ფასს არ განსაზღვრავს. ამისათვის არსებობს ექსპერტიზის ეროვნული ბიურო, რომელმაც აღნიშნულ მიწასთან დაკავშირებით 2015-2016 წლებში ორჯერ ჩაატარა ექსპერტიზა. ორივე შემთხვევაში არის დაფიქსირებული თანხა და აქედან გამომდინარე, ჩვენ ექსპერტიზის დასკვნას ვეყრდნობით.
მიწის ფასთან დაკავშირებული შეკითხვების ადრესატი სამხარაულის ბიუროა და არა თვითმმართველობა, ამიტომ უპრიანი იქნებოდა, აუდიტის სამსახურს სწორედ ბიუროსთვის მიემართა.
პოლიტიკური ძალების მიერ აქცენტის გაკეთება იმაზე, თითქოს მიწის ფასი თვითმმართველობამ დაადგინა, სხვა არაფერია, თუ არა პოლიტიკური სპეკულაცია“,- განაცხადა ჯაბა სამუშიამ.