მახინჯაურიდან ექსპრემიერ ბიძინა ივანიშვილის კუთვნილ გურიის დენდროლოგიურ პარკში მორიგი ასწლოვანი ხის გადატანას წინააღმდეგობას უწევენ ენმ-ის წარმომადგენლები, რამაც კომპანიის წარმომადგენლებსა და პარტიის წარმოამდგენლებს შორის სიტყვიერი დაპირისპირება გამოიწვია.
ადგილზე მობილიზებულები არიან სამართალდაცავები, რომლებიც ”ნაციონალური მოძარობის” წევრის, რეზო ხარაზის ტერიტორიიდან გაყვანას ცდილობენ.
დეპუტატ ელგუჯა ბაგრატიონის თქმით, ხის გადატანის სამუშაოების გამო სანაპირო ზოლი დაზიანდა.
”ჩვენ კანონიერად ვითხოვთ, რომ სამუშაოები შეჩერდეს და შესაბამისი დოკუმენტაცია წარმოგვიდგინონ. პრაქტიკულად, დაზიანდა სანაპირო ზოლი და ეს ტურისტებზეც იქონიებს გავლენას”, - აღნიშნა ელგუჯა ბაგრატიონმა.
აჭარიდან გურიის დენდროლოგიურ პარკში უკვე ათამდე ხეა გადატანილი. საერთო ჯამში 30 ხის გადანერგვა იგეგმება.