რა შეთანხმებაც არ უნდა გააფორმოს რუსეთმა, ეს ვერ გამოიღებს ვერანაირ შედეგს, - განაცხადა ევროპულ და ევროატლანტიკურ სტურქტურებში ინტეგრაციის საკითხებში სახელმწიფო მინისტრმა ვიქტორ დოლიძემ ე.წ. სამხრეთ ოსეთის ცალკეული ქვედანაყოფების რუსეთის ფედერაციის შეიარაღებულ ძალებში შესვლის შესახებ დამატებითი შეთანხმების ხელმოწერათან დაკავშირებით.
მისი თქმით, ამ შეთანხმებას საერთაშორისო სამართალთან და ფუნდამენტურ პრინციპებთან შეხება არ აქვს.
"რა შეთანხმებაც არ უნდა გააფორმოს რუსეთმა და შეზღუდოს ჩვენი თანამოქალაქეების მიმოსვლა, როგორც ლეგიტიმური ხელისუფლების მიერ კონტროლირებად, ასევე ოკუპირებულ ტერიტორიაზე, ეს ვერ გამოიღებს ვერანაირ შედეგს", - აცხადებს დოლიძე.
მინისტრი მიიჩნევს, რომ ეს შესაძლოა რუსეთს ბუმერანგივით მოუბრუნდეს. დოლიძე საქართველოს ხელისუფლების საერთაშორისო თანამეგობრობასთან ღრმა და ყოვლისმომცველ ურთიერთობაზეც ამახვილებს ყურადღებას და აცხადებს, რომ მთავრობა საერთაშორისო თანამეგობრობის წევრებთან აქტიურად მუშაობს.
ე.წ. სამხრეთ ოსეთის ცალკეული ქვედანაყოფების რუსეთის ფედერაციის შეიარაღებულ ძალებში შესვლის შესახებ დამატებით შეთანხმებას ხელი დღეს მოეწერება. ოფიციალურ დოკუმენტს რუსეთისა და ე.წ. სამხრეთ ოსეთის თავდაცვის მინისტრები მოსკოვში გააფორმებენ.
შეთანხმება ითვალისწინებს მოქალაქეების რუსეთის არმიაში კონტრაქტით სამსახურს და მათი რუსეთის სამხედრო ბაზებზე გამგზავრებას ნებაყოფლობითი წესით.
21 მარტს, სეპარატისტული სამხრეთ ოსეთის დე-ფაქტო პრეზიდენტი ლეონიდ თიბილოვი და რუსეთის მმართველი ვლადიმერ პუტინი ერთმანეთს მოსკოვში შეხვდნენ. მათ ე.წ. სამხრეთ ოსეთის ზოგიერთი შენაერთის რუსეთის შეიარაღებულ ძალებში შესვლასთან დაკავშირებული ხელშეკრულება უნდა განეხილათ.