„ისრაელის სახლის" დამფუძნებელმა იციკ მოშე ქართველი ტურისტების ისრაელიდან გამობრუნების გახშირებულ შემთხვევებს ეხმიანება და აცხადებს, რომ 100 დღის განმავლობაში ორ ქვეყანას შორის უვიზო მიმოსვლა უნდა შეწყდეს.
„ტურისტულმა კომპანიებმა უნდა იმუშაონ მხოლოდ ტურიზმზე, რაც შეეხება სამუშაო ვიზებს, ისრაელს სჭირდება პროექტებზე სამუშაოდ ადამიანები სხვადასხვა ქვეყნიდან, მაგრამ ამისათვის საჭიროა, ისრაელმა განსაზღვროს სამუშაო კვოტა საქართველოს მოქალაქეებისთვის,“ - განაცხადა იციკ მოშემ.
მისივე თქმით, „ისრაელის სახლი" აპირებს, მომავალ კვირას საქართველოსა და ისრაელის მთავრობებს მიმართოს ინიციატივით, რომ 100 დღის განმავლობაში ორ ქვეყანას შორის უვიზო მიმოსვლა შეწყდეს და პრობლემის მოგვარებაზე სპეციალურმა კომისიამ იმუშაოს.
ისრაელში საქართველოს მოქალაქეების არშეშვების და მათ მიმართ შეურაცხმყოფელი მოპყრობის ფაქტებზე ადვოკატთა დამოუკიდებელი პროფკავშირების წარმომადგენლებმა რამდენიმე დღის წინ ბრიფინგი გამართეს. დაზარალებულები ყვებიან, რომ აეროპორტში პირადი ნივთები, მობილური ტელეფონები ჩამოართვეს და იზოლირებულ ოთახში მოათავსეს. მოგვიანებით კი, საქართველოში დაბრუნება აიძულეს.