პარლამენტი, მთავრობა და სასამართლო პრეზიდენტის გადაწყვეტილების მოლოდინში. მოაწერს თუ არა ხელს გიორგი მარგველაშვილი მართლმსაჯულების რეფორმის ე.წ. მესამე ტალღის საკანონმდებლო პაკეტს, 2 დღის განმავლობაში ცნობილი გახდება.
პრეზიდენტის ადმინისტრაციაში კონსულტაციები მიმდინარეობს. ადვოკატთა ასოციაცია სახელმწიფოს მეთაურს რამდენიმე მუხლთან დაკავშირებით ვეტოს გამოყენებისკენ მოუწოდებს.
ზაზა ხატიაშვილმა ინსპექტორის ინსტიტუტზე კურიერის პირდაპირ ეთერში ისაუბრა და აღნიშნა, რომ ინსპექტორის ინსტიტუტი დადებითი მოვლენაა, თუმცა მის დამოუკიდებლობასთან დაკავშირებით ბევრი კითხვის ნიშანი გაჩნდა.
„როდესაც იუსტიციის უმაღლესი საბჭო ლევან მურუსიძეს ირჩევდა, მოსამართლეებმა პრესკონფერენცია ჩაატარეს და ლევან მურუსიძეს ვაძლევთ ხმასო, მსოფლიოში არ არსებობს ფაქტი მეორე, როდესაც მოსამართლე წევრებს პრესკონფერენცია ჩაეტარებინოთ კენჭისყრის წინ. ამ იუსტიციის საბჭოს, აძლევენ უფლებას აირჩიონ ინსპექტორი, ანუ ე.წ. პატარა მურუსიძე,“- განაცხადა ზაზა ხატიაშვილმა.
ზაზა ხატიაშვილმა მართლმსაჯულების რეფორმის ე.წ. მესამე ტალღა გააკრიტიკა.
"მესამე ტალღით მურუსიძეების ხელში გადადის მთელი ძალაუფლება, ვუთხარი პრეზიდენტს, თუ ბატონი პრეზიდენტი ვეტოს არ გამოიყენებს, იქნება საშინელება.... კატასტროფული ცვლილებები ხელს შეუწყობს იმას, რომ სასამართლოში მურუსიზაცია მოხდება,"- განაცხადა ხატიაშვილმა.
