ვერც ერთ სახელმწიფოს ვერ დამისახელებთ ისტორიულად, რომ ამდენი მაღალი თანამდებობის პირი დასჯილიყოს, თუმცა ხალხი ობიექტურად ვერ დაწყნარდა ერთი მიზეზით - „ნაციონალები“ ისევ ძალადობენ, სიტყვა „კადაფიზაციას” ახსენებენ, წარმოგიდგენიათ, სად არიან წასულები,- განაცხადა საქართველოს ყოფილმა პრემიერ-მინისტრმა ბიძინა ივანიშვილმა გადაცემაში „შეხვედრები რეგიონულ მედიასთან“.
მისი თქმით, მიუხედავად იმისა, რომ ამდენი მაღალჩინოსანი დაჭერილია, ზოგი დევნაშია, ყველა მაჩვენებლით ქვეყანა წინ მიდის.
„ჩემი პირადი განცდების გარდა, რაც მე პირადად ამერიკელებთან და ევროპელებთან პირადი საუბრებით ვიცი, ამის გარდა ნახეთ სტატისტიკა. ადამიანის უფლებების მხრივ, ადამიანის უფლებებზე მორგებული ყველა დემოკრატიის ინსტიტუტი, მედიის თავისუფლება გნებავთ, ბიზნესის თავისუფლება გნებავთ, ეკონომიკა გნებავთ, ყველგან გვაქვს მკვეთრი გაუმჯობესება“,- განაცხადა ივანიშვილმა.
ყოფილმა პრემიერმა ევროპაში ერთ-ერთი შეხვედრა გაიხსენა, სადაც რამდენიმე ევროპელი ლიდერი ყოფილი ხელისფლების წარმომადგენლებთან დაკავშირებით მოუწოდებდა მას, „რომ არცერთ შემთხვევაში არავის არ გაეკარო, მხოლოდ წინ იყურეთო“.
„მახსოვს, ევროპაში ჩავედი, 30კაციანი შეკრება მოგვიწია იურმალაში, ქალაქგარეთ გამიყვანეს, იქ იყო 3-4 პრემიერ-მინისტრი, ათი საგარეო საქმეთა მინისტრი, პერზიდენტი, საოცარი შეხვედრა იყო. ასე მაწვებოდნენ, არცერთ შემთხვევაში არავის არ გაეკარო, მხოლოდ წინ იყურეთო. როგორ ვიყურო, მე ვუხსნიდი, ჩვენც საზოგადოება ვართ, ჩვენ ისტორიული ქვეყანა ვართ, პატივცემული ხალხი ცხოვრობს ჩვენთან, ხალხს ამდენი აგრესია აქვს, ესეთი დამოკიდებულება აქვს, როგორ, რაინაირად უნდა მოხერხდეს, ან ხელოვნურად როგორ შევაჩერო, კანონმდებლობა გვაქვს, აქ ხომ კანონმა უნდა იმუშაოს. ეს პროცესები იყო უკიდურესად დაძაბული და მე ვფიქრობ, რომ აქ იყო ყველაზე დიდი გარღვევა, რაც გავაკეთეთ“,- აღნიშნა ბიძინა ივანიშვილმა.
აქვე, ყოფილმა პრემიერ-მინისტრმა განაცხადა, რომ დღევანდელ მთავრობას უკეთესი ურთიერთობა აქვს ამერიკის შეერთებულ შტატებთან და ევროპასთან.
„ნაციონალური მოძრაობისთვის“ ყველაზე დიდი ტრაგედიაა, რომ ძირითად პარტნიორთან გაცილებით უკეთესი ურთიერთობა გვაქვს. ძირითადს, რასაც ცდილობდნენ,იყო ეჩვენებინათ, რომ ვიღაც მტერი მოვედი მე და ქვეყნის დანგრევა მინდა, მიმართულების შეცვლა მინდა. გარწმუნებთ ამაშიც, რომ ძალიან დიდი ავტორიტეტით ვსარგებლობ პირადადაც და ნებისმიერ შეხვედრაში ეს გამოიკვეთა. ევროპელებთანაც გაცილებით უკეთესი გვაქვს დამოკიდებულება და აღფრთოვანებულნი არიან იმ რეფორმებით, რაც საქართველოში გატარდა, მახსოვს ევროკავშირის ელჩთან ბოლო შეხვედრა, მომილოცა პირდაპირ. საოცრება ხდება საქართველოში, ამ ფონზე ევროპაც კი უარესად გამოიყურება, როგორი სტაბილური ქვეყანა გახდა იმ ფონზე, რაც იყო. ჩვენ გავაღრმავეთ ურთიერთობა და ჭეშმარტი ნდობა მივიღეთ ევროპელებისგან და ჩვენი პარტნიორისგან, აშშ-სგან“,- განაცხადა ბიძინა ივანშვილმა.