ექს-პრემიერი ბიძინა ივანიშვილი ირწმუნება, რომ მან მედიისგან პირველად გაიგო ინფორმაცია, რომ „ქართულმა ოცნებამ“ ბანკ „ქართუდან“ წინასაარჩევნო პერიოდში მილიონი ლარის ოდენობის სესხი აიღო.
გორში რეგიონულ მედიასთან გამართულ შეხვედრაზე ივანიშვილმა აღნიშნა, რომ თუ „ოცნებამ“ თანხა ისესხა, ე.ი. გაუჭირდა.
„ეს ინფორმაცია პირველად თქვენგან მესმის, არ ვიცი. თუ ისესხა და ე.ი. გაუჭირდა. კანონი დარღვეულია? - სესხს დალხინებული კაცი არ იღებს. გაუჭირდათ და ისესხა. მთავარია, რომ კანონი არ დაირღვეს და ეჭვის საფუძველი არ გაჩნდეს, რომ მმართველი პარტია პრივილეგიებით სარგებლობს. საარჩევნო პროცესში ეს ნორმალურია. სხვათა შორის, დაფინანსების თემაზე პარტიებმა მოილაპარაკეს, რომ თანხები ერთმანეთს არ უკონტროლონ. ისევ „ნაცებმა“ მოახერხეს და ყველანაირ ფულს ბლოკავდნენ, რომ „ოცნებას“ დაფინანსება არ ჰქონოდა. „ქართუ“ ბანკში ხალხის რიგი იყო. საამაყო იყო, რაც მაშინ ხდებოდა. „ნაციონალები“ ფულის დახარჯვის საშუალებას არ გვაძლევდნენ, კანონს კანონზე იფიქრებდნენ“, - დასძინა ივანიშვილმა.
სახელმწიფო აუდიტის სამსახურის ინფორმაციით, პარტია "ქართულმა ოცნებამ" ბანკ "ქართუდან" წინასაარჩევნო პერიოდში მილიონი ლარის ოდენობის სესხი აიღო. შესაბამისი ფინანსური დოკუმენტაცია სახელმწიფო აუდიტის სამსახურის ვებ-გვერდზეა გამოქვეყნებული.
დოკუმენტის მიხედვით, "ქართული ოცნების" მიერ "ქართუდან" სესხის აღება 9 სექტემბერს მოხდა. მისი დაფარვის ვადა 4 თვე, წლიური საპროცენტო განაკვეთი კი 11 %-ია. სესხის უზრუნველყოფად მითითებულია საქართველოს საარჩევნო კოდექსის 56-ე მუხლის პირველი ნაწილი, რაც თავის მხრივ იმ პარტიების მიერ მილიონ ლარამდე გაწეული ხარჯების სახელმწიფოს მიერ ანაზღაურებას გულისხმობს, რომელმაც საარჩევნო ბარიერი გადალახა.
