„რესპუბლიკური პარტიის“ ერთ-ერთი ლიდერი თინა ხიდაშელი დავით უსუფაშვილის მიერ გასაჯაროებულ წერილს ეხმაურება, რომლითაც პარლამენტის თავმჯდომარემ ბიძინა ივანიშვილსა და გიორგი კვირიკაშვილს მიმდინარე წლის 11 მარტს მიმართა. მისი განმარტებით, წერილში არის საუბარი, რომ ”ქართულ ოცნებასთან” ”გაყრა” ყოფილიყო ცივილიზებული. თუმცა, ხიდაშელის განცხადებით, ბიძინა ივანიშვილმა გააკეთა შეურაცხმყოფელი ბრალდებები და გაჩუმებას არ აპირებს.
,,ჩვენ, პირადად დათო დაინტერესებული ვიყავით, რომ გაყრა ყოფილიყო ცივილიზებული, ევროპული. მოსახლეობასთან გვესაუბრა პენსიებზე, ეკონომიკაზე, სამუშაო ადგილებზე, საგარეო პოლიტიკაზე, ევროატლანტიკურ სივრცეზე, ამერიკულ სამხედრო ბაზებზე და არა იმ რეჟიმში, რომელშიც ახლა ვიმყოფებით. ეს ძალიან სამწუხაროა, ჩვენ არ დაგვიწყია, მაგრამ ვინაიდან მოვისმინეთ წარმოუდგენელი, შეურაცხმყოფელი ბრალდებები, რა თქმა უნდა, ჩვენ არ ვაპირებთ, რომ გავჩუმდეთ”, - განაცხადა ხიდაშელმა.
დავით უსუფაშვილი გასაჯაროვებულ წერილში ადრესატებს წერს, რომ სასწრაფოდაა გადასაწყვეტი კოალიციის საარჩევნოდ დალაგების საკითხი. მისივე შეფასებით, ეს არის ნომერ პირველი კოალიციური, სახელისუფლებო და სახელმწიფო ამოცანა. უსუფაშვილი აღნიშნავს, რომ შექმნილ ვითარებაში მას პრაქტიკულად ამოეწურა ”დამბალანსებელ-მომრიგებელ-შემრიგებელ-გადამგორებლის რესურსი”.