ეჭვი არსებობს, რომ დემურ სტურუას თვითმკვლელობამდე მიყვანაში ბრალდებულ პოლიციელს სისტემა შეგნებულად აფარებს ხელს, - ამის შესახებ „ირაკლი ალასანია - თავისუფალი დემოკრატების“ პრესსპიკერმა თამარ ამაშუკელმა პარტიის ოფისში დღეს გამართულ ბრიფინგზე განაცხადა. ამაშუკელმა იმის შესახებ ისაუბრა, რომ დემურ სტურუას საქმესთან დაკავშირებით საფუძვლიანი ეჭვი არსებობს, რომ გოდერძი თევზაძეს სისტემა შეგნებულად აფარებს ხელს. ამაშუკელის თქმით, ამის საფუძველს კი იძლევა ის მტკიცებულებები, რომლებიც უკვე იქნა წარმოდგენილი გოდერძი თევზაძის ბრალეულობის დასამტკიცებლად.
„თავისუფალი დემოკრატები“ მოვითხოვთ, გამოძიება ჩატარდეს მასშტაბურად და სრულყოფილად, რადგან მიგვაჩნია, რომ მხოლოდ ერთი ბრალდებული პოლიციელი დამოუკიდებლად ვერ მიიღებდა გადაწყვეტილებას ასეთი უკანონო ქმედების შესახებ. შესაძლოა და არსებობს ალბათობის მაღალი ხარისხი იმისა, რომ საქმის კურსში ყოფილიყვნენ მისი ზემდგომი პრები. საქმეში სწორედ მათი როლი უნდა გამოიკვეთოს და დადგინდეს იყვნენ თუ არა ჩართული თევზაძის ზემდგომი პირები სტურუას თვითმკვლელობამდე მიყვანაში. ფაქტი, რომ ამდენი ხანი კონკრეტული პიროვნება, რომელზეც არა მარტო საფუძვლიანი ეჭვი, არამედ მისი ბრალეულობის შესახებ საკმარისი მტკიცებულებებიც კი იყო წარმოდგენილი, არ იქნა დაკავებული და მას მიეცა შესაძლებლობა, მიმალვოდა გამოძიებას, ბადებს საფუძვლიან ეჭვს რომ სისტემამ მას ხელი დააფარა. დემურ სტურუა არის მსხვერპლი არა მარტო კონკრეტული სამართალდმაცავისა, რომელიც სამაგალითოდ უნდა დაისაჯოს, არამედ მანკიერი, რეპრესიული სისტემისა, რომლის რეფორმირება აუცილებელია სამართლებრივი და დემოკრატიული სახელმწიფოს მშენებლობისთვის“, - განაცხადა თამარ ამაშუკელმა.
მისივე თქმით, „თავისუფალი დემოკრატებისთვის“ სრულიად მიუღებელია ის ნარკოპოლიტიკა, რომელისაც „ქართული ოცნება“ აგრძელებს.
„ეს არის სრულიად ანტიჰუმანური, საკუთარი მოქალაქეების წინააღმდეგ მიმართული პოლიტიკა, რომლის შეცვლა ჩვენი ერთ-ერთი ძირითადი მიზანია“, - დასძინა მან.
