საპარლამენტო უმრავლესობის წევრ გია ვოლსკის განცხადებით, „ნაციონალური მოძრაობის“ და „რუსთავი 2“-ის მხრიდან ზეწოლის განხორციელება ახალი ამბავი არ არის.
საკონსტიტუციო სასამართლოს მოსამართლე ლალი ფაფიაშვილის მიერ ე..წ. გახმაურებულ საქმეებზე თვითაცილების თხოვნასთან დაკავშირებით ვოლსკიმ ასევე აღნიშნა, რომ ,გიორგი პაპუაშვილი კითხვებს კი არ უნდა სვამდეს, არამედ თავად პასუხობდეს გაჩენილ კითხვებს.
„ზეწოლა მიმდინარეობს ინტენსიური და გიორგი პაპუაშვილმა გაცილებით მეტი პასუხი უნდა გასცეს შეკითხვებს, ვიდრე შეკითხვებს სვამდეს“, - განაცხადა გია ვოლსკიმ.
ჟურნალისტის კითხვაზე, არის თუ არა სასამართლო დღემდე პოლიტიკური გავლენების ქვეშ, დეპუტატი ამბობს, რომ სასამართლო ამ დრომდე მოდიოდა სერიოზული პოლიტიკური გავლენებით.
,,ვფიქრობ, არის მოსამართლეთა ნაწილი, რომლებმაც უარი თქვეს გიორგი პაპუაშვილის ინსტრუქციების შესრულებაზე და არის ჯგუფი, რომლებიც კონკრეტული პოლიტიკური ჯგუფის მხარდამჭერია. უახლოეს პერიოდში საკონსტიტუციო სასამართლო განახლდება და განახლებული ძალებით შეუდგება მუშაობას და ვფიქრობ, ეს საკითხებიც დღის წესრიგიდან მოიხსნება“, - განაცხადა გია ვოლსკიმ.
საკონსტიტუციო სასამართლოს მეორე კოლეგიის მოსამართლე ლალი ფაფიაშვილმა საკონსტიტუციო სასამართლოს ე.წ გახმაურებულ საქმეებზე თვითგანრიდების შუამდგომლობით დღეს მიმართა.
„თავს ვალდებულად ვთვლი, მივმართო საკონსტიტუციო სასამართლოს პლენუმს, ე. წ გახმაურებელი საქმეების განხილვაში მონაწილეობისგან თვითგანრიდების შუამდგომლობით“, - განაცხადა ფაფიაშვილმა ბათუმში გამართულ ბრიფინგზე.
მისი თქმით, აცილების შუამდგომლობის დაყენება უკავშირდება 27 აგვისტოს „რუსთავი 2“-ის გადაცემა „პოსტ სკრიპტუმში“ გასულ სიუჟეტს, რომელიც ეხებოდა მის მიმართ შესაძლო ზეწოლას.