გავრცელებული ინფორმაცია რა თქმა უნდა, აჩენს სერიოზულ კითხვებს, თუ რატომ შეიძლება პროკურატურა იყოს ახლა დაინტერესებული საკონსტიტუციო სასამართლოს მოსამართლის ლალი ფაფიაშვილის დედის საქმეებით, - ამის შესახებ ახალგაზრდა იურისტთა ასოციაციის თავმჯდომარემ ანა ნაცვლიშვილმა ჟურნალისტებს განუცხადა.
„ბუნებრივია ის, რომ ამ პიროვნების შვილი არის საკონსტიტუციო სასამართლოს მოსამართლე, არავის ანიჭებს იმუნიტეტს თუ რაიმე ტიპის სამართალდარღვევაა ჩადენილი, მაგრამ დრო და კონტექსტი რა თქმა უნდა, ამ საქმის მიმართ აჩენს კითხვებს. ამიტომ ძალიან მნიშვნელოვანია, რომ არ განმეორდეს ის პრეცედენტი, რომელიც უკვე ვიხილეთ ერთ-ერთი მოსამართლის დედასთან დაკავშირებით და საზოგადოებაში არ გაჩნდეს სამართლიანად განცდა, რომ პროკურატურა თუ სხვა უწყება იყენებს ოჯახის წევრებს კონკრეტულ პირებზე ზეგავლენის მოხდენის მიზნით“, - განაცხადა ანა ნაცვლიშვილმა.
გუშინ პროკურატურამ საკონსტიტუციო სასამართლოს მოსამართლე ლალი ფაფიაშვილის დედის, ნოტარიუს ტატიანა ახვლედიანის შესახებ განცხადება გაავრცელა, სადაც აღნიშნული იყო, რომ ინფორმაცია, თითქოს მასზე პროკურატურის მხრიდან ზეწოლა ხდებოდა, სიცრუეა.