ე.წ. პირადი ცხოვრების ამსახველი კადრების გავრცელების საქმეში ბრალდებულებთან საპროცესო შეთანხმების გაფორმებაზე საბოლოო გადაწყვეტილება მიღებული არ არის, - ამის შესახებ პროკურატურის საზოგადოებასთან ურთიერთობის სამსახურის უფროსმა, ნათია სუხიაშვილმა განაცხადა.
„ამჟამად აღნიშნულ სისხლის სამართლის საქმეზე მიმდინარეობს სამართლებრივი პროცედურები, კონკრეტულად დამთავრდა წინასასამართო სხდომა, იწყება საქმის არსებითი განხილვა და შესაბამისად არ არის მიღებული საბოლოო გადაწყვეტილება. საქართველოს პროკურატურა ისევე როგორც სხვა სისხლის სამართლის საქმეებზე ამ კონკრეტულ საქმეზეც მაღალი საზოგადოებრივი ინტერესის გათვალისწინებით ღიაა და მიღებული გადაწყვეტილების შესახებ აუცილებლად მოხდება საზოგადოების ინფორმირება”, - განაცხადა ნათია სუხიაშვილმა.
გუშინ ცნობილი გახდა, რომ პირადი ცხოვრების ამსახველი ვიდეოების გავრცელების საქმეზე სამ ბრალდებულთან სავარაუდოდ საპროცესო შეთანხმება გაფორმდება. პროკურატურის წარმომადგენლის ინფორმაციით საპროცესო შეთანხმება გაუფორმდებათ ინგა ჩატოიანს, ნიკოლოზ ხაჭაპურიძეს და გელა ღურწკაიას. ისინი დანაშაულს აღიარებენ.
აღნიშნულ განცხადებას დღეს პოლიტიკოსების მხრიდან გამოხმაურება მოჰყვა. ისინი საპროცესო გარიგების შესახებ დეტალურ ინფორმაციას ითხოვენ.
