,,ნაციონალური მოძრაობის“ ერთ-ერთი ლიდერი სერგო რატიანი მიიჩნევს, რომ პროკურატურის მიერ გამოძიების დაწყება რეალურად ადასტურებს პრეზიდენტის განცხადებას. თუმცა, მისი თქმით, პრეზიდენტის და საკონსტიტუციო სასამართლოს თავმჯდომარის განცხადებებზე დაწყებული გამოძიება არა ეფექტური იქნება.
“პრეზიდენტის განცხადება იყო საგანგაშო ჩვენი საზოგადოებისთვის და მართლაც სკანდალური. ამასთან დაკავშირებით სრულიად არაადეკვატური განცხადებები ჰქონდა მთავრობის და უმრავლესობის წევრებს, იყო სამარცხვინო განცხადებები. პროკურატურის განცხადება რეალურად ადასტურებს პრეზიდენტის განცხადებას, რომ მისი ოჯახის წევრებზე რეალურად არის ზეწოლა“ - განაცხადა რატიანმა.
საქართველოს მთავარი პროკურატურის საგამოძიებო ნაწილში მოქალაქე მინდია გოგოჭურის მიმართ შინაგან საქმეთა სამინისტროს თანამშრომლების მხრიდან განხორციელებულ შესაძლო ზეწოლის ფაქტზე სამსახურებრივი უფლებამოსილების გადამეტების ნიშნებით სისხლის სამართლის კოდექსის 333-ე მუხლის I ნაწილით გამოძიება დაიწყო.