„ბიუჯეტიდან გაწეულ ხარჯებს ლარის კურსზე გავლენა არ აქვს“, - აღნიშნულის შესახებ განცხადებას ფინანსთა მინისტრის მოადგილე, სახაზინო სამსახურის უფროსი, ცოტნე ყავლაშვილი აკეთებს.
„ადამიანები ვინც ამ საკითხებში ვერ ერკვევიან, ან ერკვევიან, მაგრამ ცდილობენ საზოგადოების შეცდომაში შეყვანას, დღემდე დეკემბრის თვეს აბრალებდნენ კურსის გაუფასურებას, ვინაიდან სხვადასხვა ფაქტორის გამო, დეკემბერში წინა თვეებთან შედარებით ხარჯვა მაღალია. ივნისში, ეს არგუმენტიც ვერ იქნება მოყვანილი, ვინაიდან ივნისი არაფრით არის გამორჩეული წინა თვეებისგან, თუ არ ჩავთვლით იანვარს, როდესაც როგორც წესი, ეკონომიკური აქტივობა დაბალია. შესაბამისად, ივნისშიც იგივე ოდენობით ხარჯი გაიწევა, რაც საშუალოდ, წინა თვეების განმავლობაში“, - განაცხადა ფინანსთა მინისტრის მოადგილემ.
მისი თქმით, მნიშვნელოვანია, რომ ეკონომიკური ფაქტორები, რომლებიც გრძელვადიან პერიოდში კურსის მთავარი მდგენელია, სტაბილურია და მოსალოდნელია, რომ ლარის კურსიც იქნება სტაბილური.
