საგამოფენო ცენტრ "ექსპო ჯორჯიაში" "თავისუფალი დემოკრატების" თბილისის საქალაქო ორგანიზაციის კონფერენცია მიმდინარეობს, სადაც საქალაქო ორგანიზაციის თავმჯდომარე უნდა აირჩიონ.
პარტიის ლიდერმა ირაკლი ალასანიამ ჟურნალისტებთან განაცხადა, რომ დღეს დაიწყო მარათონი 2016 წლის არჩევნებისთვის და დარწმუნებულია, რომ ხალხის მხარდაჭერით მოვიპოვებენ.
“მოვედით იმიტომ, რომ ხალხთან ერთად გნვახორციელოთ ისეთი რეფორმები, რომ ქვეყანა შედგეს დამოუკიდებელ ევროპულ სახელმწიფოდ. დღეს 2016 წლის არჩევნებისთვის მარათონი პრაკტიკულად დავიწყეთ და დარწმუნებული ვარ, რომ ხალხის მხარდაჭერით მოვიპოვებთ უმრავლესობის მხარდაჭერას. დღეს საქალაქო პარტიის ორგანიზაცია აირჩევს თავის ხელმძღვანელებს მაგრამ მთავარი ის არის, რომ აქ ისევ ის ერთად შეკრული გუნდი ვართ, ვინც დავიწყეთ 6 წლის წინ ამ პარტიის მშენებლობა“- განაცხადა ირაკლი ალასანიამ.
,,თავისუფალი დემოკრატები“ არჩევნებში მონაწილეობას დამოუკიდებლად მიიღებენ. ალასანია მიიჩნევს, რომ იმ ელექტორატის მხარდაჭერას შეძლებენ, რომელთაც ჯერ გადაწყვეტილი არ აქვთ, თუ რომელ პოლიტიკურ ძალას დაუჭერენ მხარს.