საგარეო საქმეთა სამინისტროში გაიმართა ევროკაშირის პროექტის „კვალიფიკაციის ამაღლება საერთაშორისო ურთიერთობების სფეროში, საქართველო“ საზეიმო დახურვის ცერემონია. ღონისძიების მონაწილეებს საქართველოს საგარეო საქმეთა მინისტრმა, მიხეილ ჯანელიძემ, ევროკავშირის წარმომადგენლობის ხელმძღვანელმა საქართველოში, იანოშ ჰერმანმა, პროექტის ხელმძღვანელმა რიჩარდ ლაქინგმა და დიპლომატიური სასწავლო ცენტრის დირექტორმა, მაია ყიფშიძემ მიმართეს.
უწყების ინფორმაციით, საგარეო საქმეთა მინისტრმა საკუთარ გამოსვლაში ხაზი გაუსვა პროექტი მნიშვნელობას და აღნიშნა, რომ იგი ხელს უწყობს ინსტიტუციური განვითარების გზით საქართველოს ევროპასთან დაახლოვებას.
„ევროინტეგრაცია არის საქართველოს მთავრობის და ჩვენი მოქალაქეების მიერ გაცხადებული საგარეო კურსი, რომელიც უზრუნველყოფს საქართველოს უსაფრთხო და მდგრად განვითარებას. ამ გზაზე წარმატების მისაღწევად აუცილებელია შესაბამისი კვალიფიკაციის მქონე კადრები, რომელთა მომზადებაშიც დიდი წვლილი შეაქვს ევროკავშირს. აღნიშნულის კიდევ ერთი თვალსაჩინო მაგალითი არის ევროკავშირის ორწლიანი პროექტი. რომლის მთავარი მიზანი იყო ინსტიტუციური განვითარების გზით, საქართველოს ევროინტეგრაციის პროცესის ხელშეწყობა. საჯარო მოხელეებს კვალიფიკაციის ამაღლების შესაძლებლობა მიეცათ საერთაშორისო ურთიერთობებისა და ევროინტეგრაციის საკითხებზე. ასევე, პროექტი ითვალისწინებდა დიპლომატიური სასწავლო ცენტრის განვითარების ხელშეწყობას.“ - განაცხადა მიხეილ ჯანელიძემ.
ღონისძიებაზე დამსწრე საზოგადოებას სიტყვის მიმართა ასევე ევროკავშირის წარმომადგენლობის ხელმძღვანელმა საქართველოში, იანოშ ჰერმანმა, რომელმაც ყურადღება გაამახვილა აღნიშნული პროექტის მნიშვნელობაზე. იანოშ ჰერმანმა იმედი გამოთქვა, რომ მომავალში გაგრძელდება ევროკავშირსა და საქართველოს შორის ამ მიმართულებით თანამშრომლობა.
ევროკავშირის პროექტის ფარგლებში 500 საჯარო მოხელე გადამზადდა. მათ მონაწილეობა მიიღეს ოთხ თემატურ სასწავლო ვიზიტში ბელგიაში, ესტონეთში და ფინეთში. პროექტის ფარგლებში საქართველოს საგარეო საქმეთა სამინისტროს დიპლომატიური სასწავლო ცენტრისთვის შეიქმნა 8 ახალი სასწავლო მოდული, განხორციელდა სასწავლო ვიზიტები ცხრა ქვეყანასა და 15 დიპლომატიურ აკადემიაში.
პროექტის ბენეფიციარები გახლდათ საქართველოს საგარეო საქმეთა სამინისტრო, საგარეო საქმეთა სამინისტროს ლევან მიქელაძის სახელობის დიპლომატიური სასწავლო ცენტრი, საქართველოს სახელმწიფო მინისტრის აპარატი ევროპულ და ევროატლანტიკურ სტრუქტურებში ინტეგრაციის საკითხებში, საქართველოს ეკონომიკისა და მდგრადი განვითარების სამინისტრო. პროექტი ასევე მოიცავდა ასოცირების შეთანხმებისა და ღრმა და ყოვლისმომცველი თავისუფალი სივრცის შეთანხმების განხორციელებაზე პასუხისმგებელ დარგობრივ სამინისტროებსა და სააგენტოებს.
აღნიშნული პროექტი 2013 წლის ნოემბერში დაიწყო და კონსორციუმის მიერ განხორციელდა. მის შემადგენლობაში შედიოდა ესტონეთის დიპლომატიის სკოლა, საქართველოს სტრატეგიისა და საერთაშორისო ურთიერთობების კვლევის ფონდი და ევროპის კოლეჯი. პროექტი დააფინანსა ევროკავშირმა, ევროპის სამეზობლო და პარტნიორობის ინსტრუმენტის მეშვეობით (ENPI).