პარლამენტის ვიცე-სპიკერი გუბაზ სანიკიძე მიიჩნევს, რომ „ისლამური სახელმწიფოს“ წარმომადგენლების მიერ საქართველოსადმი გავრცელებული ვიდეომიმართვა პანიკის დათესვას ემსახურება.
როგორც ჟურნალისტებს სანიკიძემ განუცხადა, ტერორიზმის საფრთხის კუთხით, საქართველო გამონაკლისი არ არის.
მისი თქმით, აღნიშნული ვიდეომიმართვა პროვოკაციულ სახეს ატარებს.
„როგორც ჩანს, ჩვენ ტერორისტების პრიორიტეტებში არ ვართ, მაგრამ არავინ არ იცის, მათ რა გეგმები აქვთ. არავითარ შემთხვევაში, პანიკა არ შეიძლება და ამასთანავე, აუცილებელია სიფხიზლე. ჩემი მონაცემებით, შინაგან საქმეთა სამინისტრო და სპეცსამსახურები საკმაოდ ეფექტურად მუშაობენ. მშვიდად და ფხიზლად უნდა ვიყოთ. საფრთხეები მოსალოდნელი არის და ყოველთვის უარესი უნდა გავთვალოთ, რომ უკეთესი გამოგვივიდეს“, - დასძინა სანიკიძემ.
უშინ, ინტერნეტში ქართველი ხალხის მიმართ ტერორისტული დაჯგუფება „ისლამური სახელმწიფოს“ სახელით მებრძოლების ვიდეომიმართვა გავრცელდა. ქართულ ენაზე მოსაუბრე პირები ქართველი ხალხის და საქართველოში მცხოვრები მუსლიმების მიმართ საუბრობენ. ისინი მუსლიმებს „ისლამური ხალიფატის“ მხარდაჭერისკენ მოუწოდებენ, საქართველოს კი „ხალიფატის“ შემოსვლით ემუქრებიან.