ჟურნალისტი ინგა გრიგოლია „რეაქციისა“ და „იმედის კვირის“ დახურვასთან დაკავშირებით, პარლამენტის თავმჯდომარის დავით უსუფაშვილის მიერ გაკეთებულ განცხადებას ეხმაურება. მისი თქმით, დაინტერესების შემთხვევაში აუხსნის, თუ რატომ ფიქრობს, რომ პოლიტიკური დავალება შესრულდა...
„ყურადღებით მოვუსმინე, გამიკვირდა, რომ პოლიტიკურ გადაწყვეტილებას ვერ ხედავს. მეტს აღარაფერს დავწერ. არ მიმაჩნია ნორმალურად, ყოველ დილა-საღამოს ვწერო და ვამტკიცო, იყო თუ არა ჩემი დახურვა პოლიტიკური. არ მიმაჩნია ნორმალურად, დავდგე და ვიძახო, როგორ გაბედეს ჩემი დახურვათქო. არხი კერძოა და თავის გადაწყვეტილებებში თავისუფალია. მე ჩემს საქმეს გავაგრძელებ, სხვათა შორის, ძალიან დიდი ინტერესია საელჩოების მხრიდან, არასამთავრობოებისგან. ყველა შეხვედრაზე მივალ და ყველას შევხვდები ამ თემაზე, ვისაც აინტერესებს, რა როგორ მოხდა. ასევე,თუ ბ-ნ პარლამენტის თავმჯდომარეს დააინტერესებს, ავუხსნი, რატომ ვფიქრობ რომ პოლიტიკური დავალება შესრულდა... ყოველთვის, როცა მსგავსი ამბავი ხდებოდა ჩემს ცხოვრებაში, ერთ კვირაზე მეტად, არ გაგრძელებულა ჩემი დარდი.... ეგრევე ახალ პროექტებზე და გზებზე ვიწყებდი ფიქრს.... ახლაც იგივეს ვაპირებ. რაც მოხდა,უკვე წარსულია... მე კი დღეიდან სამომავლო გეგმებზე გადავედი“, - წერს facebook ის საკუთარ გვერდზე ინგა გრიგოლია.
პარლამენტის თავმჯდომარე ტელეკომპანია „იმედზე“ თოქშოუების დახურვაში პოლიტიკურ ნიშნებს ვერ ხედავს. „მინდა ვისურვო, რომ ყველა ტელეკომპანიამ დამოუკიდებლად გადაწყვიტოს თავისი პოლიტიკა, არ ჰკითხოს არავის, როცა რაიმე თოქ-შოუს ხსნის და არ ჰკითხოს არავის, როდესაც რაიმე თოქ-შოუს ხურავს, ტელეკომპანიის პირადი საქმეა, რა გადაწყვეტილებას მიიღებს“,-აღნიშნა უსუფაშვილმა.
