საპარლამენტო ფრაქცია "ქართული ოცნების" თავმჯდომარემ, გიორგი ვოლსკიმ და საგარეო ურთიერთობათა კომიტეტის თავმჯდომარის პირველმა მოადგილემ, ზვიად კვაჭანტირაძემ შვედეთის პარლამენტის სოციალ-დემოკრატების ჯგუფთან: მართლმსაჯულების საკითხთა, საგარეო ურთიერთობათა და კულტურის კომიტეტების წევრებთან - სანე ერიკსონთან, პირი ნიემისთან და აგნეტა გილესთან შეხვედრა გამართეს.
,,ვისაუბრეთ საგარეო ურთიერთობებზე, კულტურისა და სამართლებრივ საკითხებზე. ეს გაცნობითი ხასიათის შეხვედრა იყო. მათთვის საინტერესო იყო ის პროცესები, რომელიც საქართველოში მიმდინარეობს ყველა სხვა მიმართულებითაც, მაგალითად, როგორიც არის საარჩევნო კოდექსი, როგორიც არის დამოკიდებულება სოციალური საკითხების მიმართ, განსხვავებები, რომელიც ჩვენ და ოპონენტებს გაგვაჩნია მიდგომებში და რაც მთავარია, ადამიანის უფლებების დაცვის სფეროში არსებული ვითარების თაობაზე.ჩვენ, ახლახან გავხდით ევროპული სოციალ-დემოკრატიული ოჯახის წევრები, ჯერ-ჯერობით მეთვალყურის სტატუსით. ეს არ არის პირველი დელეგაცია, რომელიც ჩვენ მივიღეთ ან ვესტუმრეთ. ნელ-ნელა ჩვენი წრე მეგობრების და საქმიანი ურთიერთობების ფართოვდება და უკვე საკმაოდ შთამბეჭდავია ევროპაში ჩვენი პოზიციაც, უკვე კარგად გვიცნობენ. საპარლამენტო ასამბლეებზე, ფრაქციებში მუშაობა ჩვენთვის ძალიან საინტერესოა“, - განაცხადა გიორგი ვოლსკიმ.
