,,თავისუფალი დემოკრატების” წევრი დავით ონოფრიშვილი მიიჩნევს, რომ ელექტროენერგიაზე გაზრდილი ტარიფი მოსახლეობას მძიმე ტვირთად დააწვება.
,,ეს ძალიან მძიმე მდგომარეობაში ჩააგდებს თბილისის მოსახლეობას,"- აცხადებს დეპუტატი.
დავით ონოფრიშვილი ხელისუფლებას მიმართავს დროულად წარმოდგენოს გეგმა, თუ როგორ აპირებს ელექტროენერგიის გაზრდილი გადასახადის სუბსიდირებას.
,,ჩვენ გვაინტერესებს რა გეგმები აქვს მთავრობას, რის კომპენსაციას აპირებენ, რის ხარჯზე და თანხა საიდან მოაქვთ,"- აცხადებს დავით ონოფრიშვილი.
შეგახსენებთ, რომ საქართველოს ენერგეტიკისა და წყალმომარაგების მარეგულირებელი ეროვნული კომისიის დღევანდელი გადაწყვეტილებით, ელექტროენერგიის შესყიდვის საუშალო შეწონილი ფასი , რომელიც იყო 5.480 თ/კვტსთ და ამჟამად 11.173 თ/კვტსთ გახდა. შესაბამისად მოიმატა დედაქალაქში სამომხმარებლო ტარიფმა.
სემეკ-ის გადაწყვეტილებით, დღგ-ს გარეშე, 101 კვტსთ-ის ჩათვლით - დენის ფასი 8.034 თეთრი/კვტსთ ნაცვლად, იქნება 11.000 თ/კვტსთ; 101 კვტსთ-დან 301 კვტსთ-ის ჩათვლით, 10.56 თეთრი/კვტსთ ნაცვლად, ფასი იქნება 14.400 თ/კვტსთ; 301 კვტსთ-დან და მეტი - 14.998 თეთრი/კვტსთ ნაცვლად, 18.200 თ/კვტსთ.
ახალი ტარიფის დადგენის მიზნით, "თელასმა" კომისიას მიმდინარე წლის 23 ივლისს მიმართა. კომპანიამ სატარიფო განაცხადის წარდგენის მთავარ საფუძვლად აშშ დოლართან მიმართებაში ეროვნული ვალუტის გაცვლითი კურსის არსებითი ცვლილება, შესასყიდი ელექტროენერგიის გაზრდილი ფასი და ელექტროენერგიის გადაცემის ტარიფის ზრდა დაასახელა.
დედაქალაქის მერიაში კი აცხადებენ, რომ ელექტროენერგიის გაზრდილი გადასახადის სუბსიდირებას სოციალურად დაუცველი მოსახლეობისთვის მოახდენენ.
