კონსტიტუციური სამართლის სპეციალისტი ვახუშტი მენაბდე ცესკოს მიერ 31 ოქტომბრისთვის დანიშნულ შუალედურ არჩევნებს არაკონსტიტუციურად მიიჩნევს. როგორც მან ,,ჯი-ეიჩ-ენთან” განაცხადა, სამი თვის წინ საკონსტიტუციო სასამართლოს გადაწყვეტილებით, მაჟორიტარული ოლქები გაუქმებულია.
,,სამი თვის წინ საკონსტიტუციო სასამართლომ გააუქმა არსებული მაჟორიტარული ოლქები და იგი არასამართლიანად სცნო, როგორც თბილისთან მიმართებაში, ასევე მთელი საქართველოს მასშტაბით. ეს იმას ნიშნავს, რომ საარჩევნო ოლქები ქვეყანაში აღარ არსებობს. ის ოლქები, რომელიც აქამდე არსებობდა არაკონსტიტუციური იყო, ახალა საჭიროა ახალი ოლქების შექმნა, რომელიც 2016 წლის არჩევნებისთვის იქნება მზად. ამიტომ ცესკო-ს შუალედური არჩევნები საერთოდ არ უნდა ჩაეტარებინა, რადგან ოლქები არ აქვს”, _განაცხადა მენაბდემ.
მისი თქმით, ცესკო-მ შუალედური არჩევნების დანიშვნით, არასწორი გადაწვეტილება მიიღო.
კითხვაზე - შექმნილ სიტუაციიდან გამომდინარე, რაში ხედავს გამოსავალს, მენაბდე აცხადებს:
,,არის სამი სუბიექტი ვისაც გარკვეული დაბრკოლებებით, თუმცა შეუძლია მიმართონ საკონსტიტუციო სასამართლოს. ესენი არიან სახალხო დამცველი, პარლამენტის 1/5
და პრეზიდენტი. მათ შეუძლიათ ერთი თვის ვადაში მიმართონ საკონსტიტციო სასამართლოს და მას აქვს 30 დღიანი ვადა გადაწვეტილების მისაღებად,"- განაცხადა ვახუშტი მენაბდე.
შეგახსენებთ, პარლამენტისა და საკრებულოს შუალედური არჩევნები მიმდინარე წლის 31 ოქტომბერს გაიმართება. შუალედური არჩევნები მაჟორიტარული საარჩევნო სისტემით საგარეჯოსა და მარტვილის ოლქებში ჩატარდება. რაც შეეხება საკრებულოს შუალედურ არჩევნებს, ცესკო-ს თავმჯდომარის თქმით, კენჭისყრის პროცესი დმანისის, ვანის, ხობისა და საგარეჯოს ადგილობრივ საარჩევნო ოლქებში შედგება. მარტვილისა და საგარეჯოს საარჩევნო ოლქებში შუალედური არჩევნების ჩატარების საჭიროება იმის გამო დადგა, რომ საგარეჯოს მაჟორიტარი დეპუტატი თინათინ ხიდაშელი თავდაცვის მინისტრი გახდა, ხოლო მარტვილის მაჟორიტარი დეპუტატი ნაული ჯანაშია გარდაიცვალა.
შუალედურ არჩევნებს არასაპარლამენტო და საპარლამენტო ოპოზიციის ნაწილი ბოიკოტს უცხადებს. შუალედურ არჩევნებში სავარაუდოდ, მხოლოდ კოალაცია „ქართული ოცნებისა“ და „საქართველოს პატრიოტთა ალიანსის“ კანდიდატები იბრძოლებენ.