აჭარაში დასვენება კიდევ უფრო გაძვირდება. როგორც სააგენტო ”ჯი-ეიჩ-ენს” ბათუმში და ურეკში მდებარე სასტუმროს მფლობელებმა განუცხადეს, ელექტრო ენერგიაზე ტარიფის მატების შემდეგ, სასტუმრო ნომრებზე, გასართობ ობიექტებში- რესტორნებსა და ბუნგალოებში საფასურის მატება გარდაუვალი გახდება.
ბათუმში მდებარე, სასტუმრო ”ბიჩ ჰაუზის” მფლობელი კახაბერ ბერიძე აცხადებს, რომ ტარიფის გაზრდის შედეგად, ნომერზე ფასის ზრდა დამსვენებლის კიდევ უფრო შემცირებას გამოიწვევს, რაც მათ ბიზნესს დააზარალებს.
”სასტუმროს დიდი ელექტროენერგია სჭირდება, განსაკუთრებით ზაფხულში. მაგალითად, მთელი დღეა ჩართულია კონდიციონერი, რასაც დიდი ხარჯი აქვს. ამჟამად ერთ ადგილიანი ნომრის ფასი 50 ლარს შეადგენს, ტარიფის მომატების შემთხვევაში, ეს ფასი, რა თმა უნდა, გაიზრდება. გვაქვს ბუნგალოც და რესტორანიც. ღირებულება ამ შემთხვევაშიც მოიმატებს.
ახლა 14 ნომრიდან 4 ნომერი გვაქვს დაკავებული. შარშან სრული დატვირთვით ვმუშაობდით. დამსვენებლების რაოდენობა ძალიან არის შემცირებული და გაძვირების მერე კიდევ იკლებს”, _ აცხადებს ბათუმში მდებარე სასტუმრო ”ბიჩ ჰაუზის” მფლობელი კახაბერ ბერიძე.
გაძვირდება დასვენება ურეკშიც. სასტუმრო ”პრიმას” მენეჯერის ინგა გვალიას თქმით, დენზე ფასის მომატება, ნომრის ღირებულებას გაზრდის, თუმცა რამდენი იქნება სხვაობა ჯერ უცნობია.
”მინდა გითხრათ, რომ ურეკში ყველაფერი დენზე გვაქვს, გაზი არ არის გამოყვანილი. შესაბამისად ტარიფის მომატების შემდეგ, ხარჯი ძალიან გაგვეზრდება.ახლა ერთ ადგილიანი ნომრის ფასი სამჯერადი კვებით 35 ლარია. მალე ასე აღარ იქნება.
საფასო ცვლილება ჩვენს მუშაობაზე უარყოფითად აისახება. კიდევ უფრო შემცირდება სტუმრების რაოდენობა. შარშან აგვისტოში 70- 100 %-იანი დატვირთვა იყო, ახლა 70 ნომრიდან 25 ნომერია დაკავებული”, _ აცხადებს ურეკში მდებარე სასტუმრო ”პრიმას” მენეჯერი ინგა გვალია.
ბათუმისგან და ურეკისგან განსხვავებით, ქობულეთში მდებარე სასტუმროები
მოგების შემცირების ხარჯზე ფასს დაიჭერენ. ისინი ამ დათმობაზე მხოლოდ იმიტომ, მიდიან, რომ მთლიანად სეზონის ჩავარდნის ეშინიათ.
”ღირებულების მომატებას აზრი არ აქვს. მაინც ხალხი არ გვყავს. სასტუმროში სულ 40 ნომერია, ამჟამად აქედან 10-12 დაკავებულია. შარშან, აგვისტოში ჯავშანი სრულად იყო,100 %-იანი დატვირთვით ვმუშაობდით”, _ აღნიშნა ურეკში მდებარე სასტუმრო ”პონტოს” მფლობელმა ირმა ძიძიკაშვილმა.
სასტუმრო ”black sea”-შიც ფასის შენარჩუნებას აპირებენ. მათი თქმით, ივნისთან, ივლისთან შედარებით, აგვისტოში ნომრის ღირებულება ისედაც იზრდება და მეტად მომატება დამსვენებლის ნაკადს ძალიან შეუმცირებს.