ლაშა მახარაძის მკვლელობაში ბრალდებული გიორგი ოქროპირიძის ადვოკატი დარწმუნებულია, რომ მისი დაცვის ქვეშ მყოფს ხვალ გაათავისუფლებენ.
თბილისის საქალაქო სასამართლოში, პირადი მოტივით ცრუ დასმენის ფაქტზე გიორგი ოქროპირიძის წინასასამართლო სხდომა გაიმართა, სადაც დაცვის მხარემ დააყენა შუამდგომლობა, გაუქმდეს ოქროპირიძის მიმართ გამოყენებული აღკვეთის ღონისძიება.
ოქროპირიძის ადვოკატმა დათუნა მოდებაძემ ჟურნალისტებთან განაცხადა, რომ პროკურატურამ დაცვის მხარის შუამდგომლობაზე პასუხის გასაცემად დრო ითხოვა.
„ერთი კვირის წინ პროკურატურამ მიმართა სასამართლოს შუამდგომლობით, რომ გიორგი ოქროპირიძის მიმართ პატიმრობის ვადა გაგრძელებულიყო. მოსამართლემ უარი უთხრა, უსაფუძვლო იყო პროკურატურის შუამდგომლობა. დღეს დავაყენეთ შუამდგომლობა, რომ ოქროპირიძე გათავისუფლებულიყო პატიმრობიდან, გაუქმებულიყო აღკვეთის ღონისძიება. პროკურატურამ შუამდგომლობაზე პასუხის გასაცემად დრო ითხოვა. დარწმუნებული ვარ, რომ გიორგი ოქროპირიძე ხვალ პატიმრობიდან გათავისუფლდება“, - განაცხადა ადვოკატმა.
მისივე თქმით, ოქროპირიძის მიმართ დევნის დაწყების საფუძველი არ იყო, ასევე არ იყო საფუძველი იმისა, რომ ოქროპირიძისთვის აღკვეთის ღონისძიების სახით პატიმრობა შეეფარდებინათ.
შეგახსენებთ, ლაშა მახარაძის მკვლელობის ფაქტზე ბრალდებულ გიორგი ოქროპირიძეს ახალი ბრალი პირადი მოტივით ცრუ დასმენის ფაქტზე, მიმდინარე წლის 8 ივნისს წარედგინა.
წინასასამართლო სხდომა აღნიშნულ საქმეზე ხვალ 10:30 საათზე გაგრძელდება.