ეკონომიკის ექსპერტი რომან გოცირიძე მიიჩნევს, რომ ელექტროენერგიის ტარიფის მატების შემდეგ, აუცილებლად დადგება გაზისა და წყლის ტარიფის გადახედვის საკითხი, ისევე როგორც გაიზრდება საქალაქო ტრანსპორტით მგზავრობის ფასი. ექსპერტი აღნიშნულ საკითხებს facebook-ის საკუთარ გვერდზე ეხმიანება.
,,თავის მოტყუებაა იმაზე საუბარი, რომ ელექტროენერგიის ტარიფის მატების გამო სოციალურად დაუცველი ადამიანები არ დაზარალდებიან, რადგან მთავრობა კომპენსირებას თუ სუბსიდირებას აპირებს. ისინი და დანარჩენი სხვებიც, მათ შორის ბიზნესი, დაზარალდება ფასების საერთო დონის ზრდის შედეგად.
არც ენერგეტიკის სექტორისთვისაა ეს ტარიფი საკმარისი, რომ მან განვითარება შეძლოს.
გამოსავალი მდგომარეობს იმ მანკიერი ეკონომიკური პოლიტიკის შეცვლში, რომელსაც მთავრობა აწარმოებდა ბოლო წლების განმავლობაში. განსაკუთრებით ეს ეხება არასწორ საბიუჯეტო პოლიტიკას, რომელიც არის მრავალი პრობლემის წყარო.
ყველაფერი კი დაიწყო იმ უგუნური გადაწყვეტილებით, როდესაც დენის ტარიფი შეამცირეს მასში არსებული საინვესტიციო კომპონენტის გაუქმების ხარჯზე. ანუ, ენერგოკომპანიებს მიეცათ უფლება არ შეეყვანათ ვალდებულებით ნაკისრი ახალი სიმძლავრეები მოქმედებაში და არ განეხორციელებინათ სისტემის მოდერნიზაციის სამუშაოები. შედეგად მივიღეთ ელექტროენერგიის იმპორტის მატება, რომელმაც სერიოზული როლი ითამაშა დენის ღირებულების გადიდებაში.
მთავრობამ თითიც კი არ გაანძრია ბიუჯეტის დეფიციტის შესამცირებლად. ამას კი მოჰყვება ფასების ზრდა და გაურკვევლობა ლარის კურსთან დაკავშირებით.
მომავალში აუცილებლად დადგება გაზისა და წყლის ტარიფის გადახედვის საკითხი, ისევე როგორც გაიზრდება საქალაქო ტრანსპორტით, მათ შორის მეტროპოლიტენით მგზავრობის ფასი ან მისი სუბსიდირების დანახარჯები.
ტექნიკური გადაწყვეტილება, ან დენის სუბსიდირება ან დიფერენცირებული ტარიფები, ერთმანეთზე უარესია.
ცხოვრება მაინც აიძულებს ხელისუფლებას სწორ გზას დაადგეს, მაგრამ ეს იქნება ძალიან დაგვიანებული და ბევრი რამის დაზიანების ფასად.
ახლა კი ერთი რამ თუ დარჩენიათ- ბოდიშის მოხდა უაზრო საარჩევნო დაპირებების თუნდაც მცირე ნაწილის აღსრულების გამო”, - აცხადებს რომან გოცირიძე.