დედაქალაქის მუნიციპალიტეტის საკრებულოში იურიდიულ საკითხთა კომისიის სხდომა გაიმართა, სადაც დეპუტატებმა დღის წესრიგით გათვალისწინებულ საკითხებზე იმსჯელეს.
კომისიის თავმჯდომარემ - თევდორე კობახიძემ, კომისიის წევრებს წარმომადგენლობითი ორგანოს განკარგულების პროექტი გააცნო, რომელიც „ლილოს მიუსაფართა თავშესაფრის" დაფუძნების საკითხს ეხებოდა.
თევდორე კობახიძის განცხადებით, ქვეყანაში გასული წლების განმავლობაში დაგროვილი მძიმე სოციალურ-ეკონომიკური ვითარების გამო, მოსახლეობის გარკვეულ ნაწილს ისეთი სახის პრობლემები შეექმნათ, როგორიცაა: თავშესაფრის არქონა, საკვების, მედიკამენტების თუ სამედიცინო მომსახურებისათვის საჭირო სასხსრების მოპოვება და უმუშევრობასთან დაკავშირებული საკითხები.
„აღნიშნული პრობლემების მოგვარების მიზნით, საქართველოს პრემიერ-მინისტრის გადაწყვეტილებით, შეიქმნა საგანგებო უწყებათაშორისი კომისია, რომელსაც უსახლკარო მოქალაქეებისათვის დროებითი თავშესაფრის უმოკლეს ვადაში მოწყობა დაევალა, რაც მალევე, მოსკოვის პროსპექტზე განხორციელდა. მინდა მოგახსენოთ, რომ 2014 წლის ოქტომბერში, დედაქალაქის მთავრობის მიერ შეიქმნა თბილისის ტერიტორიაზე მცხოვრებ მიუსაფარ პირთა პრობლემებზე მომუშავე კომისია და ამავე წლის ნოემბრიდან მათზე მზრუნველობას მერიის ჯანდაცვისა და სოციალური მომსახურების საქალაქო სამსახური ახორციელებს. ოპტიმალური გამოსავლის ძიებისა და ერთობლივი მუშაობის შედეგად, უკვე დღეს, მიუსაფარ პირთა მდგომარეობის გაუმჯობესების მიზნით, ლილოს ტერიტორიაზე თავშესაფრის მშენებლობა მიმდინარეობს“, - განაცხადა თევდორე კობახიძემ.
მისივე განმარტებით, „ლილოს მიუსაფართა თავშესაფრის“ შექმნა, ბიუჯეტიდან დამატებითი ასიგნებების გამოყოფას არ საჭიროებს.
დღესვე დეპუტატებმა, მარინა დათუკიშვილის უფლებამოსილების ცნობასთან დაკავშირებითაც იმსჯელეს.
თბილისის მუნიციპალიტეტის საკრებულოს 2015 წლის 17 ივლისის რიგგარეშე სხდომაზე, პირადი განცხადების საფუძველზე, უფლებამოსილება შეუწყდა ფრაქცია „ერთიანი ნაციონალური მოძრაობა“ პარტიული სიით არჩეულ თბილისის მუნიციპალიტეტის საკრებულოს წევრს ლევან მხეიძეს. საქართველოს ცენტრალური სარჩევნო კომისიის თავმჯდომარის მიერ, საქართველოს საარჩევნო კოდექსის მოთხოვნათა შესაბამისად, თბილისის მუნიციპალიტეტის საკრებულოს გამოკლებული წევრის ლევან მხეიძის ადგილმონაცვლედ წარმოდგენილ იქნა ამავე პარტიული სიით საკრებულოს წევრობის კანდიდატი მარინა დათუკიშვილი.
სხდომაზე განხილული საკითხები, დღესვე ბიუროსა და საკრებულოს სხდომაზე იქნება დასამტკიცებლად წარდგენილი.