საქართველოს თავდაცვის მინისტრი აცხადებს, რომ ქართულ მხარეს ,,ისლამური სახელმწიფოსგან” რაიმე საფრთხეებთან დაკავშირებით, მონაცემები არ აქვს.
თინა ხიდაშელმა თურქეთის მიერ სახელმწიფოს საზღვრების გაძლიერების გადაწყვეტილების კომენტირებისას ჟურნალისტებს განუცხადა, რომ ტურისტული სეზონი საქართველოში ძალიან კარგად მიმდინარეობს და ყველაფერი მშვიდობიანად და სტაბილურად განვითარდება.
,,საქართველოს, როგორც ყველა ნორმალურ ქვეყანას, აქვს საფრთხეების დოკუმენტი. უმრავლეს შემთხვევაში ამ ტიპის საფრთხეებზე ძირითადი პასუხისმგებლობა მოდის არა თავდაცვის სამინისტროზე, არამედ უშიშროების სამსახურებსა და შს სამინისტროზე. თუმცა ჩვენ, რა თქმა უნდა, მუდმივად მზადყოფნის რეჟიმში ვართ, რომ თუ საჭირო გახდა – დაწყებული ბუნებრივი კატასტროფით შექმნილი საფრთხეებიდან, დამთავრებული ასეთი ტიპის საფრთხეების მოლოდინით, დავეხმაროთ შესაბამის უწყებებს ამ საფრთხეების ნეიტრალიზებაში ან თავად ავიღოთ უკვე პასუხისმგებლობა იქ, სადაც თავდაცვის სამინისტრო ხდება მთავარი კომპონენტი. ჩვენ არ ველოდებით, რომ რაიმე განსაკუთრებული პრობლემები იქნება საქართველოში, ყოველ შემთხვევაში არ გვაქვს არანაირი მონაცემები აღნიშნულთან მიმართებაში. ტურისტული სეზონი ჩვენთან ძალიან კარგად მიმდინარეობს და დარწმუნებული ვარ, რომ ყველაფერი მშვიდობიანად და სტაბილურად განვითარდება", - განაცხადა თინა ხიდაშელმა.
შეგახსენებთ, თურქეთი "ისლამური სახელმწიფოდან" მომდინარე საფრთხეების გამო საკუთარ საზღვრებს გააძლიერებს, მათ შორის - საკურორტო ზონებში.
