„ერთიანი ნაციონალური მოძრაობის“ დეპუტატის გიორგი გაბაშვილი ყოფილ პრემიერ-მინისტრს ბიძინა ივანიშვილს მოუწოდებს, ყურად იღოს ევროპარლამენტართა განცხადება. მისი განმარტებით, ევროპარლამენტარების მიერ გაკეთებული შეფასებები, რომელიც საქართველოში პოლიტიკური ნიშნით დევნას შეეხებოდა, უმნიშვნელოვანესია, როგორც ქვეყნის დემოკრატიის წინსვლისთვის, ასევე ევროპული მომავლისთვის.
,,საყურადღებო და მკვეთრი განცხადება გააკეთა ევროპარლამენტის საგარეო კომიტეტის თავმჯდომარემ და დიდი გავლენის მქონე ევროპარლამენტის წევრმა ელმარ ბროკმა. ასეთი დონის ფიგურა - რომელიც ევროკავშირის საგარეო პოლიტიკის ერთ–ერთი მთავარი გადაწყვეტილების მიმღებია - პირდაპირ ამბობს, რომ ენმ–ს ლიდერები პოლიტდევნილები არიან და მათ უსწრაფესად უნდა დატოვონ საპატიმროები, რათა საქართველო გადავიდეს განვითარების შემდგომ ეტაპზე. მალე იქნება სტრასბურგის სასამართლოს პირველი გადაწყვეტილება ვანო მერაბიშვილის საქმეზე, რომლის იგნორირებას ივანიშვილი ვეღარ შეძლებს. მოვუწოდებთ მთავრობას და ივანიშვილს, ყურად იღოს ეს განცხადება და მსხვერპლად ნუ შესწირავს საკუთარ ვიწრო ინტერესს საქართველოს ევროპულ მომავალს“, _ განაცხადა გიორგი გაბაშვილმა.
25 ივლისს, საქართველოში ოფიციალური ვიზიტით მყოფი ევროპარლამენტის საგარეო საქმეთა კომიტეტის წარმომადგენლები, ე.წ. მატროსოვის ციხეში იმყოფებოდნენ და იქ მყოფ ყოფილ მაღალჩინოსნებს შეხვდნენ, რის შემდეგ ელმარ ბროკმა განაცხადა, რომ ქვეყნისთვის კარგი იქნება, თუ შერჩევითი სამართლის ასეთი ნიშნები გაქრება.
