ეუთოს საპარლამენტო ასამბლეა საკომიტეტო მოსმენებს განაგრძობს. ყოველწლიური სესიის ფარგლებში ინტენსიურ რეჟიმში საკითხთა ფართო სპექტრი სხვადასხვა კომიტეტში დისკუსიის და აზრთა გამოთქმის ფონზე მიმდინარეობს.
დემოკრატიის, ადამიანის უფლებათა და ჰუმანიტარულ საკითხთა საერთო კომიტეტზე დებატები სერბი პარლამენტარის, გორდანა ჩომიჩის რეზოლუციის პროექტზე გაიმართა. საკითხი შეეხებოდა ლტოლვილთა და იძულებით გადაადგილებულ პირთა, ეროვნული და სექსუალური უმცირესობების უფლებების დაცვას და ODIHR საქმიანობის გაძლიერების პრინციპებს. საქართველოს საპარლამენტო დელეგაციის წევრმა, გიორგი ვოლსკიმ კომიტეტის სხდომაზე 4 ცვლილების პროექტი წამოაყენა, რომლებიც ხმათა უმრავლესობით იქნა გაზიარებული. ცვლილებების არსი იძულებით გადაადგილებულ პირთა სამართლებრივ უფლებებს და მათ მუდმივ საცხოვრებელ ადგილებში დაბრუნების საკითხებს შეეხებოდა.
საკომიტეტო ფორმატში მუშაობას საპარლამენტო ასამბლეა ხვალაც გააგრძელებს. ყოველწლიური სესია კი პლენარული სხდომით დასრულდება, რომელზეც განვლილი სამუშაოების ანალიზი, ეუთოს წევრი ქვეყნებისთვის შესაბამისი რეკომენდაციები და სამომავლო აქტივობები განიხილება.
