ექსპერტი ეკონომიკის საკითხებში რომან გოცირიძე მიიჩნევს, რომ სომხეთში მომიტინგეების გამარჯვება, სინამდვილეში დამარცხების ტოლფასია და ამას სომხური საზოგადოება მალე მიხვდება.
..გამარჯვება, რომელიც დამარცხების ტოლფასია! სომხეთში დემონსტრანტებმა "გაიმარჯვეს"! დენის ტარიფი არ გაიზრდება. მთავრობა ბიუჯეტიდან გადაიხდის სხვაობას, რომელსაც სუბსიდირება ჰქვია. " გამარჯვებულები" ვერ ხვდებიან, რომ ფული ჩუმად მაინც ამოაცალეს ჯიბიდან. ფასები მაინც გაიზრდება, მათ შორის გაზზეც და ელექტროენერგიაზეც, როცა ბიუჯეტში ფული არ ექნებათ და ცხოვრება კიდევ უფრო გაუძვირდებათ საკუთარი ვალუტის გაუფასურების გამო.
როგორც ჩანს, სომხური საზოგადოება ჯერ კიდევ არ არის მომწიფებული იმ დონეზე, რომ სწორი აქცენტები დასვან საპროტესტო გამოსვლებისას.
ნელ-ნელა მიხვდებიან. თუნდათ ამ დამარცხების ტოლფასი გამარჯვების გამოც”, - აცხადებს რომან გოცირიძე.
სომხეთის პრეზიდენტმა სერჟ სარქისიანმა დღეს მიიღო გადაწყვეტილება, რომ ქვეყანაში ელექტოენერგიაზე ტარიფი აღარ გაიზრდება. პრეზიდენტის გადაწყვეტილებით, ყველა ხარჯს დროებით საკუთარ თავზე სახელმწიფო აიღებს.
ერევნის მოედნებიდან და ქუჩებიდან გაყვანილია სპეციალური ტექნიკა, რომელიც მიტინგის დროს იყო მობილიზებული. აქციის ორგანიზატორები გამარჯვებას ზეიმობენ.
სომხეთის მთავრობა 1 აგვისტოდან ელექტროენერგიაზე ტარიფის მომატებას 16 პროცენტით გეგმავდა, რის გამოც ერევანში 19 ივნისიდან საპროტესტო გამოსვლები დაიწყო.