ექსპერტ გია ხუხაშვილის აზრით, „ნაციონალურ მოძრაობაში“ შიდა დაპირისპირებაა და სწორედ ამან განაპირობა 4 წევრის, მათ შორის აღმასრულებელი მდივნის, პარტიის რიგებიდან წასვლა. ამის შესახებ გია ხუხაშვილმა გადაცემა „არჩევანში“ განაცხადა.
„მიზეზი ძალიან ბანალურია. 3 წლის განმავლობაში პარტია [ნაციონალური მოძრაობა] ძალიან ბევრს მუშაობდა და ფაქტიურად პოლიტიკურ დღის წესრიგს ჰქმნიდა და შედეგი ვერ მიიღო. ამ დიდ ძალისხმევას არ მოჰყვა ის შედეგი, რაც უნდოდათ მიეღოთ. შესაბამისად, როდესაც გარე ფრონტზე ვერ იმარჯვებ, ენერგია, რომელიც არ არის რეალიზებული, შიდა დაპირისპირებაში გადადის“, – განაცხადა ხუხაშვილმა.
ამასთანავე ექსპერტმა აღნიშნა, რომ ამ პროცესს დიდ მნიშვნელობას არ ანიჭებს.
„ ეს არ არის მნიშვნელოვანი მოვლენა. ვინც არ უნდა წავიდეს, ჩვენ უნდა ვიცოდეთ მარტივი რაღაცა: ქვეყანაში არის 2 მოთამაშე, ვინც რეალურად ზემოქმედებს პროცესებზე. ესენი არიან ბიძინა ივანიშვილი და მიხეილ სააკაშვილი ეს არის გარკვეული ფსიქოლოგიური დარტყმა. 4 ადამიანის წასვლით „ნაციონალურ მოძრაობას“, რა თქმა უნდა, დააკლდა, მაგრამ 2 კვირის შემდეგ ის რეიტინგს აღიდგენს, იმიტომ რომ რეალურად „ნაცმოძრაობა“ და მისი ამომრჩეველი არიან იქ, სადაც მიშა სააკაშვილია“, – განაცხადა ხუხაშვილმა.
