საქართველოს ექსპრეზიდენტის მიხეილ სააკაშვილის განცხადებით, 2011 წლის 26 მაისს დამოუკიდებლობის დღესასწაულის ჩაშლის მცდელობა იყო მას შემდეგ კი ეს დღესასწაული სულ გაუქმებულია. ამის შესახებ მან საპრეზიდენტო ბიბლიოთეკაში, დამოუკიდებლობის დღისადმი მიძღვნილ კონფერენციაზე „დამოუკიდებლობის ექვსი ამბავი“ კიევიდან ჩართვის დროს განაცხადა.
„2011 წელს, ამ დღესასწაულს დაარტყა საქართველოს მტერმა, მათმა აგენტებმა, გრუს გადმოგზავნილმა ჯგუფმა. 2011 წელს 26 მაისის ჩაშლის მცდელობა ჰქონდათ. ეს არ არის შემთხვევითი. შემდგომ მოვიდნენ და გააუქმეს საერთოდ ეს დღესასწაული, რითაც გვითხრეს, თქვენ არავინ არ ხართ. თქვენ ხართ ჩვეულებრივი ბანძებიო. ბანძები არიან ისინი, ჩვენ ვართ საქართველო და საქართველო გაიმარჯვებს“, - განაცხადა მიხეილ სააკაშვილმა.
მისი თქმით, მათი მთავრობის პირობებში საქართველო გამთლიანდება და აუცილებლად, შეუქცევადად დაიბრუნებს ადგილს მსოფლიო რუკაზე.
„აღლუმის გაუქმება არ არის შემთხვევითი. ზუსტად იგივეს აკეთებდა ყოველ წელიწადს იანუკოვიჩი აქ. იანუკოვიჩმა გააუქმა უკარინის დამოუკიდებლობის დღეს სამხედრო აღლუმი და უკრაინა ამას აღარ აკეთებდა. დაახლოებით, იგივე პროცესი მიდის საქართველოში - თავდაცვის სამინისტროს გეგმაზომიერი ნგრევა, ქართული ჯარის განადგურება, რომელიც ჩვენ ყველამ ერთად შევქმენით. განადგურება ჩვენი კონტრდაზვერვის, საუკეთესო კადრების დევნა, ვინც ებრძოდა დამპყრობლებს, ვინც ებრძოდა ჯაშუშებს. მართლაც, ახლა არის გადამწყვეტი ბრძოლა. ამ ბრძოლაში ჩვენ აუცილებლად გავიმარჯვებთ, იმიტომ, რომ ამ იმპერიას ღირსეული პერსპექტივა არ აქვს. ჩვენი მთავრობის პირობებში საქართველო გამთლიანდება და აუცილებლად, შეუქცევადად დაიბრუნებს ადგილს მსოფლიო რუკაზე“, - განაცხადა სააკაშვილმა და დასძინა, რომ იგი არის ძალიან ოპტიმისტურად განწყობილი.