ბაქო-თბილისი-ყარსის სარკინიგზო მაგისტრალის გამოყენება ყველა დაინტერესებულ ქვეყანას შეეძლება, მათ შორის ევროპულ ევროპულ სახელმწიფოებს, აღნიშნულის შესახებ განცხადება აზერბაიჯანის ფინანსთა მინისტრმა სამირ შარიფოვმა გააკეთა. მინისტრის თქმით, ბაქო-თბილისი-ყარსის მაგისტრალი გააძლიერებს აზერბაიჯანის სატრანსპორტო პოზიციას და სატრანსპორტო კორიდორი მომგებიანი იქნება ყველასთვის, მათ შორის ჩინეთისათვისაც.
”ჩინური პროდუქცია ბაქო-თბილისი-ყარსის მაგისტრალის მეშვეობით შესაძლოა მიეწოდოს შუა აზიისა და კასპიის ზღვის ქვეყნებს, ასევე აზერბაიჯანს, საქართველოს თურქეთს და ევროპულ ბაზრებს.
იმავდროულად ჩინეთი გახდება სატრანსპორტო ჰაბი ჩრდილოეთ-დასავლეთ რეგიონისთვის”, აღნიშნა აზერბაიჯანის პირველმა ფინანსისტმა.
როგორც ცნობილია, ბაქო-თბილისი-ყარსის სარკინიგზო მაგისტრალზე სამუშაო/სატესტო მატარებლმა 2014 წლის ბოლოს უკვე გაიარა. მაგისტრალის ქართული მონაკვეთის პრეზენტაციას საქართველოს ეკონომიკისა და მდგრადი განვითარების მინისტრი გიორგი კვირიკაშვილი და აზერბაიჯანის ტრანსპორტის მინისტრი ზია მამედოვი დაესწრნენ.
ბაქო-თბილისი-ყარსის რკინიგზა რეგიონის ყველაზე მნიშვნელოვან პროექტად არის დასახელებული.
ახალ რკინიგზას წელიწადში 1 მილიონი მგზავრის გადაყვანისა და, პირველ ეტაპზე, 5 მილიონი ტონა ტვირთის გატარების პოტენციალი ექნება. სატვირთო მოცულობა მუდმივად გაიზრდება და მეორე ეტაპისთვის წელიწადში 15 მილიონი ტონა ტვირთის გადაზიდვა იგეგმება. აღსანიშნავია, რომ რკინიგზის ამოქმედების შემდეგ დამატებით 2500 ადამიანი დასაქმდება.
