ჯანდაცვის სამინისტროს ინიციატივას, რომ სულ მცირე, 200 დასახელების პირველადი მოხმარების მედიკამენტზე ფასები შემცირდება, არაერთგვაროვანი შევასებები მოჰყვა. ექსპერტები მიესალმებიან მედიკამენტებზე ფასის დაწევას, თუმცა მოსალოდნელ საფრთხეებზეც საუბობენ. „ჯი-ეიჩ-ენი“ საზოგადოებრივი ჯანდაცვის პოლიტიკისა და მართვის სპეციალისტს, მედიცინის დოქტორს სერგო ჩიხლაძეს ესაუბრა, რომელიც აღნიშნავს, რომ არ არის გამორიცხული რომ ხელოვნურად შემცირებული ფასების მქონე მედიკამენტების დეფიციტი შეიქმნას. მისივე თქმით, ეს ნიშნავს ფასების რეგულირების პროცესში სახელმწიფოს უხეშ ჩარევას, პირდაპირი ან არაპირდაპირი გზით.
”თავისთავად ამაში ცუდი არაფერია, ყველას გაგვიხარდება თუ ფასები დაიკლებს, იქნება ეს მედიკამენტი თუ სხვა სახის მომსახურება. შევხედოთ ამას სხვა მხრიდან, გადავდოთ ემოციები და პოპულიზმზე, გათვლილი მოლოდინები. რას ნიშნავს ფასების დაწევა? გავიხსენოთ მინისტრის მიერ გაჟღერებული იგივე ინიციატივა რამდენიმე თვის წინ გაკეთებული, რომ თუ მედიკამენტებზე ფასები გაიზრდება დოტაციებს გავზრდით. ამ ლოგიკით, აუცილებელ პროდუქტებზე ფასების ზრდას რა უნდა დავუპისრისპიროთ? ტალონების დაბეჭდვა პურსა და შაქარზე?! ამ ხაზის გაგრძელებაა დღევანდელი განცხადებაც. ეს ნიშნავს ფასების რეგულირების პროცესში სახელმწიფოს უხეშ ჩარევას, პირდაპირი ან არაპირდაპირი გზით. რამდენიც არ უნდა ისაუბრონ ფარმაცევტული კომპანიების ალტრუიზმსა და სოლიდარობაზე, ნებისმიერი ფარმაკომპანია უპირველესად არის მომგებიანი კომერციული ორგანიზაცია. მარტივად რომ ვთქვათ, თუ რომელიმე კომპანია დაწევს ფასს რამდენიმე ათეული დასახელების წამალზე, სხვა რამდენიმე ათეული დასახელების წამალზე ფასი აიწევს. მარტივად რომ ვთქვათ, თუ ხვალ შევალ აფთიაქში და რომელიმე არც თუ ისე ძვირი წამალი 5 ლარის ნაცვლად ეღირება 4 და 50, სხვა 10 ან 20 ლარის ღირებულების წამალი გახდება 12, 15 ან 25 ლარი შესაბამისად. ეს არის ელემენტარული ჭეშმარიტება, რაც უნდა გავითვალისწინოთ. განსაკუთრებით, მხედველობაში თუ მივიღებთ მიმდინარე ინფლაციას და ლარის კატასტროფულ დევალვაციას. ან არის მეორე ვარიანტი, ასევე, არასახარბიელო, რომ ხელოვნურად შემცირებული ფასების მქონე მედიკამენტების გარკვეული დეფიციტი შეიქმნას. შორს აღარ წავალ, ეს საკმაოდ დიდი მოცულობის თემაა სამსჯელოდ.
საერთოდ, საქართველოს ჯანდაცვაში ბოლო ხანია წესად დამკვიდრდა და დაიწყო აბსოლუტურად გაუაზრებელი პოლიტიკა სახელმწიფოს მიერ მართული კლინიკები, სახელმწიფოს მიერ მართული დაზღვევა, სახელმწიფოს მიერ რეგულირებული ფასები და ფასწარმოქმნა. არ არის საჭირო იყო სფეროს ექსპერტი ან ეკონომისტი, რომ მიხვდე რა საფრთხეებთან არის ეს დაკავშირებული. ბოლოს და ბოლოს სახელმწიფოს მიერ მართულმა ჯანდაცვამ საბოლოოდ რა შედეგები გამოიღო სსრკ-ში და სხვა ქვეყნებშიც, ეს ხომ მაინც კარგად ახსოვს უმეტესობას?!
მსგავსი პოლიტიკა და მიდგომა, კიდევ ვიმეორებ, არის პოპულისტური მიდგომა, რომელიც გრძელვადიან პერსპექტივაში გამოიწვევს ჯანდაცვის სფეროს კოლაფსს, რომლის აღდგენასაც რამდენიმე წელიც არ ეყოფა. შორსმიმავალი კი არა, უკვე გაჩნდა ჯანდაცვის მესვეურების, ოფიციალური პირების კომენტარები, საყოველთაო ჯანდაცვის სისტემის ისევ კერძო სადაზღვევოებზე გადაცემის შესახებ და ა.შ. გარდა ამისა, მნიშვნელოვნად არის დაქვეითებული ჯანდაცვის სერვისების ხარისხი, აბსოლუტურად სავალალო მდგომარეობაშია კერძო სადაზღვევო სისტემა, რომელიც ისედაც არ იყო გამართული საქართველოში და ახლა საერთოდ კაბალურ მდგომარეობაშია, არის სახელმწიფოს დავალიანებები კლინიკების მიმართ და სხვ. სამწუხაროდ, პრობლემები და ნაკლოვანებები სულ უფრო მოიმატებს მიმდინარე წლის განმავლობაში, რაც დრო გავა”, - განაცხადა ”ჯი-ეიჩ-ენთან” საუბარში ჩიხლაძემ.
