პრემიერ-მინისტრმა ირაკლი ღარიბაშვილმა საგარეო საქმეთა მინისტრს თამარ ბერუჩაშვილს მთავრობის დღევანდელ სხდომაზე დაავალა დღესვე შეხვდეს შვეიცარიის ელჩს გიუნტერ ბეხლერის და გაარკვიოს მისი მხრიდან გამოთქმული პრეტენზიები.
"მინდა, ქალბატონ თამარს ვთხოვო, რომ იქნებ, დღეს შეხვდეთ შვეიცარიის ელჩს და გაარკვიოთ, რატომ არის ბატონი ელჩი შეწუხებული. მეც მზად ვარ, შევხვდე და მოვისმინო მისი წუხილი, რადგან ჩვენ გვაქვს პრეტენზია, რომ ვართ ერთ-ერთი ყველაზე გამჭვირვალე ქვეყანა და მთავრობა არა მხოლოდ რეგიონში, არამედ ევროპის ფარგლებშიც. სწორედ ამიტომ ჩემთვის, რა თქმა უნდა, ძალიან მნიშვნელოვანია, რას ფიქრობს ჩვენი მეგობარი ქვეყნის ელჩი", - მიმართა ღარიბაშვილმა ბერუჩაშვილს.
ამასთან პრემიერმა შს მინისტრ ვახტანგ გომელაურს მოუწოდა საჭიროების შემთხვევაში ჩაერთოს საკითხის გარკვევაში.
,,ბატონო ვახტანგ, თუ საჭიროა თქვენც ჩაერთეთ და გაარკვიეთ ყველაფერი. მეც მზად ვარ, რომ დავინტერესდე ამ საკითხით, თუ რაიმე რეალური ფაქტი არსებობს", - განაცხადა პრემიერმა.
შეგახსენებთ, რომ შვეიცარიის ელჩმა გიუნტერ ბეხლერმა ერთ-ერთ ინტერვიუში განაცხადა, რომ უცხოელ ინვესტორებს საქართველოში სერიოზული პრობლემები აწუხებთ.
მისივე განმარტებით, ქვეყანაში არსებობს მოულოდნელი საგადასახადო პრობლემები და ჯარიმები, შესაძლოა, უცხოელი ინვესტორებისთვის რისკებს წარმოადგენდეს.