საქართველოს ეკონომიკისა და მდგრადი განვითარების სამინისტროსთან თანამშრომლობით მსოფლიო ბანკის ტექნიკური დახმარების ფარგლებში, მიმდინარეობს პროექტი “Development of a Green Growth Strategy for the Freight Transport and Logistics Sector in Georgia“.
აღნიშნული პროექტის ფარგლებში, 31 მარტს, სასტუმრო “Radisson Blu Iveria”-ში, მსოფლიო ბანკის ორგანიზებით გაიმართა სემინარი თემაზე — „სატვირთო ტრანსპორტისა და ლოგისტიკური მომსახურებების განვითარება საქართველოში.“ ღონისძიებას ესწრებოდნენ ეკონომიკისა და მდგრადი განვითარების მინისტრის მოადგილე ნათია მიქელაძე, ფინანსთა მინისტრის მოადგილე დავით ლეჟავა და მსოფლიო ბანკის სამხრეთ კავკასიის რეგიონალური დირექტორი ჰენრი ქერალი.
პროექტის მიზანს წარმოადგენს სატვირთო გადაზიდვებისა და ლოგისტიკის სექტორის განვითარება, საინვესტიციო პროგრამის შემუშავება მულტიმოდალური სატვირთო დერეფნების და მწვანე ლოგისტიკის განვითარების მიზნით, ასევე კვალიფიკაციის ამაღლების შესაძლებლობა საქართველოს საჯარო და კერძო სექტორის წარმომადგენლებისთვის. სემინარზე მიმდინარე პროექტის ფარგლებში განხორციელებული მიღწევების, სამომავლო გეგმებისა და გამოწვევების შესახებ იმსჯელეს.
სახელმწიფო უწყებების გარდა, სემინარში ასევე მონაწილეობდენ კერძო სექტორისა და ლოგისტიკის განხრით ორი მნიშვნელოვანი სასწავლო დაწესებულების წარმომადგენლები - ბათუმის საზღვაო სახელმწიფო აკადემია და საქართველოს ტექნიკური უნივერსიტეტი.
