სამეგრელო-ზემო სვანეთის რეგიონში ამჯერად 272 მილიონი ლარის ღირებულების 26 ინფრასტრუქტურული პროექტი ხორციელდება. საქართველოს პრემიერ-მინისტრის განმარტებით, ინფრასტრუქტურის განვითარება პირდაპირ განაპირობებს რეგიონის წინსვლას, ცხოვრების დონის ამაღლებას.
”ეს პროექტები მოიცავს საავტომობილო გზების მშენებლობა-რეაბილიტაციას, წყალმომარაგება-კანალიზაციის სისტემების მშენებლობა-რეაბილიტაციასა და მყარი ნარჩენების მართვას. 2013-2014 წლებში სამეგრელო-ზემო სვანეთში ჩვენ განვახორციელეთ 69 მილიონილარის ღირებულების 63 პროექტი. ამჯერად ხორციელდება 272 მილიონი ლარის ღირებულების 26 ინფრასტრუქტურული პროექტი.
ამ ინფრასტურუქტურულ პროექტებს შორის მე მინდა აღვნიშნო ასევე 166 მილიონი ლარის ღირებულების სხვადასხვა მიმართულების პროექტები. ესენი გახლავთ: რუხის მრავალპროფილიანი კლინიკის კომპლექსის მშენებლობა, ანაკლიის ნაპირდამცავი ნაგებობის მშენებლობა, ზუგდიდში და ფოთში იძულებით გადაადგილებული პირებისთვის საცხოვრებელი კორპუსების მშენებლობა, თეთნულდის სამთო-სათხილამურო ტრასებისა და მთის ინფრასტრუქტურის განვითარების პროექტი, რომელიც ძალიან მნიშვნელოვანია სამეგრელო-ზემო სვანეთში ტურიზმის განვითარების კუთხით”,- განაცხადა ირაკლი ღარიბაშვილმა ანაკლიაში ბიზნესმენებთან შეხვედრისას, სადაც კერძო სექტორს ხელისუფლების წარმომადგენლებმა სამეგრელო-ზემო სვანეთის რეგიონი პოტენციალი და დაგეგმილი და მიმდინარე პროექტები გააცნეს.
რაც შეეხება მიმდინარე წლის გეგმებს, - რეგიონში დაგეგმილია 124 მილიონ ლარზე მეტი ღირებულების 19 ინფრასტრუქტურული პროექტი და 33-კილომეტრიანი საავტომობილო გზის რეაბილიტაცია.