საქართველოში საავიაციო ნაწილების მწარმოებელი ქარხნის მშენებლობა იგეგმება. პროექტს ქართული მხარე ისრაელში რეგისტრირებულ კომპანია ELBIT SYSTEMS-CYCLONE-თან ერთად განახორციელებს, რომლის წარმომადგენლებიც საბოლოო დეტალების დასაზუსტებლად თბილისში მომავალ კვირაში ჩამოდიან. ირკვევა, რომ პროექტი „საპარტნიორო ფონდის” მეშვეობით განხორციელდება, სადაც საბოლოო შეთანხმების მიღწევამდე პროექტის დეტალებზე არ საუბრობენ, თუმცა განმარტავენ, რომ აღნიშნული მიმართულებით ფონდი უკვე 1 წელია მუშაობს.
როგორც მთავრობის № 494 განკარგულებაშია აღნიშნული, მინისტრთა კაბინეტმა უკვე მოიწონა საავიაციო ნაწილების მწარმოებელი ქარხნის პროექტთან დაკავშირებით მათთვის წარდგენილი ინფორმაცია.
„უცხოელი კონტრაჰენტების მონაწილეობით ხელშეკრულებების გაფორმებასთან დაკავშირებულ ზოგიერთ ღონისძიებათა შესახებ“ საქართველოს მთავრობის 2010 წლის 11 მაისის №139 დადგენილების შესაბამისად, მოწონებულ იქნეს სს „საპარტნიორო ფონდს“, ისრაელში რეგისტრირებულ კომპანია ELBIT SYSTEMS-CYCLONE -სა და საქართველოს ეკონომიკისა და მდგრადი განვითარების სამინისტროს სისტემაში შემავალი საჯარო სამართლის იურიდიული პირის − სახელმწიფო ქონების ეროვნული სააგენტოს მიერ, კანონმდებლობით დადგენილი წესით, დასაფუძნებელ შეზღუდული პასუხისმგებლობის საზოგადოებას შორის გასაფორმებელი ხელშეკრულების პროექტები” (“Shareholders Agreement” და ”Turn-Key Agreement”), - აღნიშნულია მთავრობის განკარგულებაშია.