"ყირგიზეთში განვითარებული მოვლენები უფრო შიდაპრობლემებისა და სირთულეების შედეგია. ბიშკეკში არეულობა რუსეთს არ უნდა აძლევდეს ხელს, რადგან ყირგიზეთი მისი სამხრეთი ფლანდია, იქვე ავღანეთია და მთელი რიგი პრობლემაა ერთმანეთში გადაჯაჭვული. როცა მეზობლად სახლი იწყვის, ის შეიძლება შენც გადმოგედოს, აქედან გამომდინარე, მეზობელ სახელმწიფოში ხანძარი არავისთვისაა ხელსაყრელი, თუ, რა თქმა უნდა, ის მეზობელი შენთან მტრულ დამოკიდებულებაში არ არის. ასეთი ურთიერთობა კი რუსეთის ხელისუფლებას ბაკიევის ადმინისტრაციასთან არ ჰქონია. გარდა ამისა, აღნიშნულის არგუმენტად იმის დასახელებაც შეიძლება, რომ რუსეთს იქ სამხედრო ბაზა აქვს. მართალია, ადრე იყო მოსკოვის მიერ იმის მცდელობა, რომ ყირგიზეთიდან ამერიკული სამხედრო ბაზები გაედევნა, თუმცა საერთო ჯამში, რუსები და ამერიკელები შეთანხმდნენ, რომ ავღანეთში სიტუაციის დასარეგულირებლად ამ ბაზის არსებობა საჭიროა. რუსები მიხვდნენ, რომ ავღანეთის პრობლემის მოგვარება რუსეთისთვის უფრო მნიშვნელოვანია, ვიდრე ამერიკელებისთვის", - განუცხადა აბაშიძემ "ჯი-ეიჩ-ენს".

რაც შეეხება ყირგიზეთში არეულობით შეერთებული შტატების შესაძლო დაინტერესებას, ექსპერტის განმარტებით, აშშ რუსეთზე კიდევ უფროა დაინტერესებული ბიშკეკში სტაბილურობით, რადგან ყირგიზეთში სამხედრო ბაზა აქვს.

"ეს ბაზა ერთ-ერთი უმნიშვნელოვანესია ავღანეთთან სატრანზიტო თვალსაზრისით, რადგან დღის განმავლობაში ტვირთების ათეულობით საჰაერო გადაზიდვა ხორციელდება", - განმარტავს ექსპერტი.