საქართველოს პრემიერ-მინისტრი ნიკა გილაური ასტანაში სამუშაო ვიზიტის ფარგლებში ყაზახ კოლეგა მინისტრს კარიმ მასიმოვს შეხვდა.
როგორც შეხვედრის დასრულების შემდეგ გამართულ ერთობლივ ბრიფინგზე გილაურმა განაცხადა, შეხვედრაზე ენერგეტიკული საკითხები და ასევე საქართველოსა და აზერბაიჯანის ტერიტორიების გავლით ყაზახური პროდუქციის ტრანსპორტირებას შეეხებოდა.
"ასევე საუბარი გაიმართა ფოთში ხორბლის საცავის მშენებლობაზე, რომლის დეტალებიც სექტემბერ-ოქტომბერში, ყაზახეთის პრემიერის საქართველოში ვიზიტის დროს შეთანხმდება", - იტყობინება "ჯი-ეიჩ-ენის" კორესპონდენტი, რომელიც ასტანაში იმყოფება.
ამასთან, გილაურმა ყაზახ კოლეგასთან საუბარი კონსტრუქციულად შეაფასა და კარიმ მასიმოვს აღნიშნულისთვის მადლობა გადაუხადა, რის შემდეგაც თბილისში მოიწვია.
შეგახსენებთ, რომ საქართველოს სამთავრობო დელეგაცია, რომელსაც ნიკა გილაური ხელმძღვანელობს ყაზახეთში გუშინ გაემგზავრა. მთავრობის წევრები თბილისში რამდენიმე საათში დაბრუნდებიან.
