საქართველოში აშშ-ის ვიცე-პრეზიდენტის, მაიკ პენსის ვიზიტთან დაკავშირებით საზოგადოებრივი მაუწყებლის აღმასრულებელი საბჭო განცხადებას ავრცელებს.
როგორც განცხადებაში წერია, საზოგადოებრივი მაუწყებელი მაიკ პენსის ვიზიტის გაშუქებისას ყველა მაუწყებელს სიგნალს უსასყიდლოდ მიაწვდის.
"საქართველოს სტრატეგიული პარტნიორის, ამერიკის შეერთებული შტატების ვიცე-პრეზიდენტის და მისი მეუღლის ოფიციალური ვიზიტი უაღრესად მნიშვნელოვანი მოვლენაა ჩვენი ქვეყნისთვის. ამდენად, საზოგადოებრივი მაუწყებელი არა მხოლოდ უზრუნველყოფს ვიზიტის ფარგლებში დაგეგმილი ღონისძიებების ტრანსლირებას, არამედ, მოსახლეობის უკეთ ინფორმირების მიზნით, გამონაკლისის სახით, მზად არის, უსასყიდლოდ მიაწოდოს სიგნალი ყველა მაუწყებელს. დაინტერესებულ ორგანიზაციებს შეუძლიათ, მიმართონ საზოგადოებრივი მაუწყებლის ტექნიკურ სამსახურს"- აღნიშნულია განცხადებაში.
ცნობისთვის, მაიკ პენსი საქართველოში 31 ივლისს ჩამოვა. აშშ-ის ვიცე-პრეზიდენტს ოფიციალური შეხვედრები და ღონისძიებები პირველ აგვისტოს აქვს დაგეგმილი.